Á dögunum voru Shearer og Henry valdir fyrstir inn í frægðarhöll ensku úrvalsdeildarinnar. Mirror greindi frá því í dag að Ryan Giggs hafi átt að vera fyrstur inn ásamt Sherarer en eftir að fréttir bárust af því að tvær konur hefðu kært Giggs fyrir árás var hætt við það og Henry bætt inn í staðinn.

Giggs er goðsögn hjá Manchester United og vann meðal annars þrettán Englandsmeistaratitla hjá félaginu. Segir í frétt Mirror að þetta hafi komið Giggs verulega á óvart og sé hann sármóðgaður yfir þróun mála. Honum finnst að sín persónulegu mál komi þessu ekkert við ásamt því að enn á eftir að dæma í málinu.

Shearer er markahæsti leikmaður í sögu ensku úrvalsdeildarinnar. Þá var Henry langbesti leikmaður deildarinnar á sínum tíma hjá Arsenal en hann skoraði 175 mörk í deildinni og vann deildina tvisvar.

Hér að neðan er listi yfir þá 23 leikmenn sem hægt er að kjósa inn í frægðarhöllina næst. Þess má geta að nokkrir þessara leikmanna hafa einnig komist í kast við lögin.

Tony Adams, David Beckham, Dennis Bergkamp, Sol Campbell, Eric Cantona, Andrew Cole, Didier Drogba, Les Ferdinand, Rio Ferdinand, Robbie Fowler, Steven Gerrard, Roy Keane, Frank Lampard, Matt Le Tissier, Michael Owen, Peter Schmeichel, Paul Scholes, John Terry, Robin van Persie, Nemanja Vidic, Patrick Viera og Ian Wright.