Um næstu helgi mun enska knattspyrnusambandið, enska úrvaldseildin og félögin sem í henni eru ásamt fleirum hætta að nota samfélagsmiðla tímabundið. Bannið mun standa yfir um helgina og á að vera til þess að mótmæla kynþáttaníð á samfélagsmiðlum.

Stan Collymore segir í grein á Mirror í dag að þetta muni ekkert hjálpa til í baráttunni við kynþáttaníð á samfélagsmiðlum sem hefur verið afar áberandi upp á síðkastið.

„Þessir þrír dagar munu ekki laga neitt og í þokkabót er þetta fríhelgi í Bretlandi svo fólk verður hvort eð er ekkert á samfélagsmiðlum,“ sagði Collymore í greininni.

„Fólk mun segja að þrír dagar sé betra en ekkert og ég hef heyrt að leikmenn séu virkilega ánægðir og finnist þetta gott fyrsta skref. En fyrsta skref er eitthvað sem við eigum að gera í fyrsta skipti en við höfum verið þarna áður svo þetta svo þetta gefur mönnum falska von.“

„Hvað gerist svo á degi fjögur?“

„Þetta er bara gert til þess að segjast hafa gert þetta og þarna komast allir framhjá því að móðga styrktaraðila þar sem þetta er svo stuttur tími. Betra hefði verið að hafa þetta yfir heilt tímabil.“

„Ég myndi vilja sjá FIFA búa til sinn eigin miðil og þar þarf fólk að sýna fram á skilríki til að komast þarna inn þar sem stóru miðlarnir gera ekkert í þessu.“