FourFourTwo tók saman lista yfir bestu hægri bakverði heims í dag. Á þessum áhugaverða lista má finna bæði kunnugleg nöfn sem og minna þekkt. Njótið.
10. Sergino Dest (20 ára, Barcelona)
Barcelona borgaði Ajax 20 milljónir punda fyrir leikmanninn síðastliðið sumar og virðist það vera að borga sig. Dest er snöggur, áræðinn og góður á boltanum. Hann hefur unnið vel með Lionel Messi á hægri vængnum hjá Barca. Hann er einn besti sóknarbakvörður í boltanum í dag en getur þó bætt varnarleik sinn töluvert. Til að mynda þegar það kemur að tímasetningum á tæklingum og skallaeinvígum. Dest á bandarískan faðir og hollenska móðir. Hann spilar fyrir landslið Bandaríkjanna.
9. Fabian Centonze (25 ára, Metz)
Áreiðanlegur leikmaður í miðlungsliði í Frakklandi. Virkilega öruggur varnarlega og staðsetur sig frábærlega á vellinum. Hann er ekki mesti nútímabakvörðurinn á listanum en stendur sína vakt vel.
8. Reece James (21 árs, Chelsea)
Þrátt fyrir gríðarlegt magn af hægri bakvörðum hefur James tekist að brjóta sér inn í landslið Englands með frammistöðum sínum. Hann gefur ekki jafngóðar fyrirgjafir og Trent Alexander-Arnold og hleypur ekki jafnhratt og Kyle Walker en hann getur svo sannarlega staðið sig með prýði í öllum þáttum leiksins. Hann er flottur varnarlega og getur ógnað fram á við.
7. Juan Cuadrado (32 ára, Juventus)
Cuadrado kom til Juventus sem kantmaður en hefur fest sig í sessi sem hægri bakvörður liðins undir stjórn Andrea Pirlo. Hann hefur verið að bæta sig í að staðsetja sig á vellinum og tímasetur hlaup sín fram á við virkilega vel.
6. Kyle Walker (30 ára, Manchester City)
Þrátt fyrir að Walker hafi þurft að sætta sig við töluverða bekkjarsetu á þessu tímabili eftir komu Joao Cancelo er leikmaður enn mjög öflugur. Hann er kraftmikill, hraður og áræðinn sem fyrr. Fyrirgjafir hans eru ákveðinn veikleiki. Hann hefur aðeins lagt upp 15 mörk í 175 leikjum fyrir City. Það er þó ekki hægt að horfa framhjá styrk hans varnarlega.
5. Leo Dubois (26 ára, Lyon)
Nútamabakvörður í orðsins fyllstu merkingu. Dubois hefur brotið sér leið inn í franska landsliðið og er einn besti hægri bakvörður í Ligue 1. Hann er óhræddur við að koma sér inn á síðasta vallarþriðjunginn og gefa virkilega hættulegur fyrirfjafir. Hann er öruggur á boltanum en getur einnig staðið sig vel varnarlega.
4. Kieran Trippier (30 ára, Atletico Madrid)
Besti hægri bakvörður í La Liga á þessu tímabili. Hann er stöðugur varnarlega og hefur einnig lagt upp 6 mörk á leiktíðinni. Hann er ekki sjá fljótasti eða sterkasti en yfirvegun hans, fyrirgjafir og föst leikatriði gera hann öflugan sóknarlega.
3. Achraf Hakimi (22 ára, Inter)
Verið einn sá besti á tímabilinu í liði Inter sem stefnir hraðbyri í átt að Ítalíumeistaratitlinum. Hann er bæði skapandi og skorar mörk. Þá býr hann yfir miklum hraða og mikilli sendingagetu.
2. Trent Alexander-Arnold (22 ára, Liverpool)
Hefur ekki alltaf verið upp á sitt besta á þessu tímabili en er samt sem áður einn sá besti í heimi. Það kom virkilega á óvart þegar hann var ekki valinn í landsliðsverkefni með Englandi í mars og fékk Gareth Southgate, landsliðsþjálfari, mikla gagnrýni fyrir það. Trent hefur sett markið svo hátt að tímabilið í ár flokkast sem hálfger vonbrigði þrátt fyrir að leikmaðurinn hafi lagt upp 7 mörk og skorað 2. Hann var næststoðsendingahæsti leikmaður ensku úrvalsdeildarinnar á síðustu leiktíð, með 13 talsins. Trent hlýtur að fá kallið frá Southgate fyrir EM í sumar.
1. Joao Cancelo (26 ára, Manchester City)
Það er ekki oft sem bakvörður er stjörnuleikmaðurinn í Englandsmeistaraliði en það stefnir í að Cancelo verði það í ár fyrir City. Hann er eins og varnarmaður, miðjumaður og sóknarmaður, allt í einum manni. Hann er alltaf á réttum stað og hefur aðlagað leik sinn eftir þörfum Pep Guardiola, stjóra liðsins. Hann er með mikla sendingahæfni, rólegur á boltanum og öruggur varnarlega. Þá getur hann einnig spilað í vinstri bakverði. Frábær leikmaður.
