Guðjón Þórðarsson, fyrrum landsliðsþjálfari Íslands í knattspyrnu ýjar að því að ekki sé allt með felldu innan íslenska karlalandsliðsins þessa dagana.

Það vakti athygli á dögunum þegar að Gylfi Þór Sigurðsson, besti leikmaður Íslands síðustu ár, dró sig úr landsliðshópnum á dögunum. Gylfi á von á sínu fyrsta barni á næstunni og vildi vera áfram heima í Englandi hjá eiginkonu sinni.

Guðjón Þórðarsson, ýjaði að því í hlaðvarpsþættinum The Mike Show að ástæðan fyrir fjarveru Gylfa væri önnur. Vísir.is greindi frá.

„„Það sem ég er búinn að heyra í nokkra daga er að það sé ágreiningur eða núningur, þú getur kallað það hvað sem, á milli Gylfa og hugsanlegrar stöðunnar hjá Eiði Smára,“ sagði Guðjón.

„Það er ekki góðs viti ef það er einhver núningur þar innan vébanda eða innan liðsins. Ég veit ekkert hvernig það er en þetta er það sem maður heyrir. Forystan þarf þá að koma fram og segja að það sé bara alls ekki.“

„Það heyrist að Gylfi sé ósáttur við þá sem stöðu sem uppi er og upp hefur komið. Ég þekki það ekki en þetta er það sem maður heyrir. Ef að það eru einhver vandamál þá þarf að leysa þau og standa saman og stíga saman í sömu átt.“

Guðjón gaf ekki upp mögulega ástæðu fyrir því að ósætti gæti verið á milli aðilanna vegna stöðu Eiðs.

Vísir.is reyndi fyrr í kvöld að spyrja forystumenn Knattspyrnusambands Íslands út í þennan orðróm en hafði ekki erindi sem erfiði.