Árni Vilhjálmsson var gestur í þættinum 433.is sem sýndur var á Hringbraut í gær. Í þættinum talaði Árni meðal annars um erfiðan tíma á sínum knattspyrnuferli.

Árni samdi nýverið við Breiðablik eftir að hafa verið án félags síðan í september á síðasta ári en hann var síðast á mála hjá úkraínska liðinu Kolos Kovalivka. Árni hefur þó haldið sér vel við og viðurkennir að kærasta sín, Sara Björk Gunnarsdóttir, leikmaður Lyon, landsliðsfyrirliði og íþróttamaður ársins 2020, hafi hjálpað sér mikið.

„Ég er búinn að vera í toppþjálfun síðan þá í Frakklandi. Ég hef verið með góðan einkaþjálfara þar, fótboltaþjálfara. Svo er maður dálítið bilaður sjálfur, ég er æfingasjúkur og það er ennþá betra að eiga konu sem er æfingasjúk líka. Hún hefur hjálpað mér að halda mér á tánum og að hafa hausinn í lagi, komið með mér út á völl þegar þess þarf.“

Árni hefur verið atvinnumaður í knattspyrnu undanfarin ár og viðurkennir að það hafi tekið á þegar að hann var allt í einu án félagsins og þurfti að æfa sjálfur í marga mánuði til að halda sér í standi.

„Það sem tók mest á var það sem tók við þegar ég hafði lokið æfingu dagsins, var kominn heim og búinn að borða hádegismatinn. Maður býr sér til rútínu og einhverja stefnu í hausnum, þegar maður er búinn að gera það og trúir sjálfur á stefnuna, þá er þetta ekkert það flókið. Þú ert bara á þinni vegferð.“

Árni hugsaði aldrei um að gefast upp og í gegnum þennan tíma þar sem hann var án félags skipti það miklu máli að geta reitt sig á Söru Björk.

„Hefði ég farið að gefast upp þá hefði þetta verið erfitt. Ég er ótrúlega heppinn með konu sem ber mann áfram líka. Ég fékk stuðning alltaf þegar á þurfti.“

„Ég er með besta íþróttamann á Íslandi mér við hlið og hvað þá manneskju sem er í sama atvinnugeira og ég. Við erum skilningsrík gagnvart hvort öðru í þessum málum, það hjálpar mikið til.“

Viðtalið við Árna Vilhjálmsson, leikmann Breiðabliks og þátt 433.is .frá því gærkvöldi má sjá hér fyrir neðan.