David Ornstein, blaðamaður hjá The Athletic, telur að Harry Kane, framherji Tottenaham, vilji yfirgefa félagið en að það muni ekki gerast á allra næstunni.

Harry Kane er 28 ára gamall og hefur margoft lýst því yfir að hann vilji vinna til fjölda titla hjá sínu félagsliði. Möguleikarnir á því hjá Tottenham fara hverfandi þó svo að liðið sé komið í úrslit enska deildarbikarsins.

Tottenham féll úr leik í 16-liða úrslitum Evrópudeildarinnar eftir óvænt tap gegn króatíska liðinu Dinamo Zagreb og þá er liðið ekki að keppa um titil í ensku úrvalsdeildinni.

„Ég tala við marga aðila innan knattspyrnugeirans og þeir sammælast um að Kane vilji fara frá Tottenham en hann getur ekki sagt það opinberlega. Hann er fyrirliði liðsins og leggur sig allan fram á meðan að hann er leikmaður félagsins en hann vill fara og vinna marga titla, stærstu titla sem í boði eru,“ sagði David Ornstein í viðtali hjá SkySports.

Ornstein telur hins vegar mjög ólíklegt að Kane muni yfirgefa herbúðir Tottenham í sumar þegar að félagsskiptaglugginn opnar. Kane er lykilmaður liðsins.

„Ég held að hann sé opinn fyrir félagsskiptum en hins vegar er mjög ólíklegt að slíkt gerist. Daniel Levy, formaður Tottenham, myndi vilja fá stjarnfræðilega upphæð fyrir leikmanninn. Það hefur verið talað um að lið verði að bjóða yfir 120 milljónir punda, fyrir það eitt að Levy taki tilboðið til greina,“ sagði Ornstein.

Kane er með samning við Tottenham til ársins 2024 og þar með eru forráðamenn Tottenham ekki í neinni hættu um að missa leikmanninn frá sér og þurfa ekki að taka tilboði í hann.

Kane á að baki 326 leiki fyrir Tottenham, hann hefur skorað 214 mörk fyrir félagið í þeim leikjum og gefið 46 stoðsendingar.