Arnar Þór Viðarsson landsliðsþjálfari Íslands kynnti sinn fyrsta landsliðshóp í gær. Þetta eru fyrstu leikir Íslands undir stjórn Arnars Þórs og eru þeir allir þrír liður í undankeppni HM 2022, en lokakeppnin fer fram í Katar. Fimm framherjar eru í íslenska hópnum.
Ísland mætir fyrst Þýskalandi, síðan Armeníu og endar svo á leik gegn Liechtenstein, en allir leikirnir fara fram ytra.
Fimm framherjar eru í hópi Íslands en besti framherji Íslands síðustu ár, Alfreð Finnbogason verður fjarverandi vegna meiðsla. Kolbeinn Sigþórsson er í hópnum en framherjinn knái getur slegið markamet landsliðsins í ferðinni.
Kolbeinn skoraði flest af sínum mörkum til ársins 2016 en frá þeim tíma hefur hann mikið misst út vegna meiðsla. „Auðvitað er alltaf spurning með Kolbeinn sem er álagsstýring, hversu mikið ræður hann við. Hversu mikið tekur hann þátt í æfingum, frekar sleppa æfingum og vera í 20-30 mínútna. rullu í leikjum,“ sagði Eiður Smári Guðjohnsen aðstoðarþjálfari liðsins í gær.
Af orðum Eiðs Smára má ekki reikna með því að Kolbeinn sé í standi til að byrja leik, ef Kolbeinn er tekinn út fyrir sviga eru ekki mörg mörk í hinum fjórum framherjunum í hópnum.
Jón Daði Böðvarsson, Albert Guðmundsson, Hólmbert Aron Friðjónsson og Björn Bergmann Sigurðarson hafa samtals spilað 94 landsleiki, mörkin hjá þeim fjórum eru níu. Þeir fjórir skora mark á 10,4 leikja fresti.
Jón Daði hefur spilað 55 landsleiki og skorað í þeim þrjú mörk, hann er með mestu reynsluna í hópnum en Hólmbert Aron hefur spilað fjóra landsleiki og skorað í þeim tvö mörk.
Af leikmönnum Íslands sem eru með fulla heilsu er líklegast að Gylfi Þór Sigurðsson þurfi að draga vagninn í markaskorun en miðjumaðurinn hefur skorað 25 mörk í 78 landsleikjum.
Framherjar Íslands:
Jón Daði Böðvarsson | Millwall | 55 leikir, 3 mörk
Kolbeinn Sigþórsson | IFK Göteborg | 60 leikir, 26 mörk
Albert Guðmundsson | AZ Alkmaar | 18 leikir, 3 mörk
Hólmbert Aron Friðjónsson | Brescia | 4 leikir, 2 mörk
Björn Bergmann Sigurðarson | Molde | 17 leikir, 1 mark
