Adriano hefði getað orðið einn besti knattspyrnumaður í heimi en áföll í fjölskyldu hans höfðu gríðarleg áhrif á hann. Adriano vakti gríðarlega athygli þegar hann gekk í raðir Inter árið 2001, fljótt sáust hæfileikar framherjans frá Brasilíu.
Adriano fagnar 39 ára afmæli sínu í dag og í erlendum fjölmiðlum er eru gamlir liðsfélagar að ræða þennan merkilega knattspyrnumann.
Undirbúningstímabilið árið 2004 breytti miklu í lífi Adriano þegar símtal frá heimalandinu kom. „Hann fékk símtal frá Brasilíu um að faðir sinn væri látinn. Ég sá hann í herberginu og hann kastaði símanum frá sér og öskraði. Þú getur ekki ímyndað þér svona öskur, ég fæ hroll við að tala um þetta í dag,“ segir Javier Zanetti fyrrum samherji Adriano hjá Inter.
Adriano hafði orðið þjóðhetja í Brasilíu nokkrum vikum áður, hann hafði jafnað í uppbótatíma gegn Argentínu í úrslitaleik Copa America. Brasilía vann að lokum leiknn. Draumar hans voru að rætast en martröð hans varð að veruleika nokkrum vikum síðar.
Adriano var bara 22 ára þegar faðir hans fékk hjartaáfall, hann hafði glímt við veikindi vegna byssukúlu sem var föst í höfði hans.
„Hann hélt áfram að spila fótbolta, skoraði mörk og benti til himna til að minnast föður síns. Eftir símtalið var hann samt aldrei samur“
Adriano hefur sjálfur rætt um málið. „Andlát föður míns hafði gríðarleg áhrif á mig. Ég var einn og þunglyndur, ég byrjaði að drekka á þessum tíma,“ sagði Adriano um málið.
„Ég kunni ekki að fela þetta því ég var líka fullur á æfingum, ég var alltaf fullur. Félagið stóð með mér og reyndi að fela þetta.“
