Cristiano Ronaldo, leikmaður Juventus, hvatti liðsfélaga sína til dáða og undirstrikaði mikilvægi þess að ná langt í Meistaradeild Evrópu á Instagram í dag. Hann vill koma í veg fyrir að félagið geri sömu mistök og í fyrra.

Juventus mætir Porto í 16-liða úrslitum Meistaradeildarinnar á morgun. Liðið datt úr leik í 16-liða úrslitum á síðasta tímabili eftir óvænt tap gegn franska liðinu Lyon.

„Þetta er það sem Meistaradeild Evrópu snýst um, útsláttarkeppnina. Nú hefst ný keppni, allir þurfa að vera upp á sitt besta vegna þess að hvert einasta smáatriði getur skorið úr um úrslitin,“ skrifaði Ronaldo á samfélagsmiðlinum Instagram.

Juventus hefur ekki gengið nægilega vel á undanförnum árum í Meistaradeild Evrópu og Ronaldo er meðvitaður um þá staðreynd.

„Undanfarin ár höfum við dottið úr leik fyrr en við hefðum vilja, við reynum að stefna hærra á hverju tímabili og það er engin undantekning á því núna. Á morgun eigum við mikilvægan leik gegn sterku liði og ég get aðeins vonað að þetta sé byrjunin á langri vegferð okkar að úrslitaleiknum,“ skrifaði Ronaldo.

Ronaldo er orðinn 36 ára gamall og vill ólmur bæta við öðrum Meistaradeildartitli í bikarasafn sitt en hann hefur staðið uppi sem sigurvegari í fimm skipti í Meistaradeild Evrópu. Fjórum sinnum með Real Madrid og einu sinni með Manchester United.