Íslandsvinurinn, Mason Greenwood hefur fengið nýjan og betri samning hjá Manchester United. Greenwood skrifaði í dag undir tæplega fimm ára samning við félagið.

Greenwood vakti athygli hér á landi í september á síðasta ári þegar hann var rekinn heim úr enska landsliðinu eftir sóttvarnarbrot á Hótel Sögu þar sem íslenskar konur komu við sögu.

Greenwood er 19 ára gamall og er yngsti markaskorari í sögu United í Evrópu. Hann hefur spilað 82 leiki fyrir félagið þrátt fyrir ungan aldur.

„Þegar þú gengur til liðs við félagið sjö ára gamall, þá er þetta draumurinn þinn að spila fyrir aðalliðið. Ég hef lagt svo mikið á mig til að komast á þetta stig,“ segir Greenwood.

„Með stuðningi stjórans og þjálfaraliðsins, auk þessara frábæru leikmanna sem ég læri af er ég viss um að ég geti bætt mig. Ég á eftir að verða betri, ég vil borga félaginu til baka fyrir allan stuðninginn.“