Danski framherjinn Nicklas Bendtner var í ítarlegu viðtali hjá tímariti FourFourTwo á dögunum. Leikmaðurinn átti góða og slæma tíma hjá Arsenal og greindi frá því að árið 2013 hafi soðið upp úr í samskiptum hans og forráðamanna Arsenal.

Bendtner eyddi yfir áratug hjá Arsenal, spilaði 171 leik, skoraði 47 mörk og gaf 22 stoðsendingar. Hann vildi yfirgefa liðið árið 2013 en Wenger neitaði að láta hann fara.

„Við bárum virðingu fyrir hvor öðrum og áttum góða fundi, við vorum einnig hreinskilnir. Sumarið 2013 vildi ég fara frá Arsenal og Crystal Palace hafði boðið mér góðan samning. Ekkert varð af félagsskiptunum því Arsenal fann ekki leikmann í staðinn fyrir mig,“ segir Bendtner.

Bendtner endaði með því að spila eitt ár í viðbót með félaginu en segist hafa verið það staðráðinn í að reyna komast í burtu sumarið 2013 að hann hafi meðal annars tekið upp á því að uppnefna Wenger og móðga hann til að reyna fá hann til þess að selja sig.

„Wenger hringdi í mig og sagði ‘fyrirgefðu, þú getur ekki farið.’ Fyrir mig var það mikið högg, ég hafði beðið í langan tíma eftir því að fara. Ég kallaði Wenger skíthæl svo hann myndi neyðast til þess að selja mig en það virkaði ekki. Það sýndi mér hans karakter því hann útskýrði það fyrir mér að þetta væri besta niðurstaðan fyrir félagið,“ sagði Nicklas Bendtner, fyrrverandi leikmaður Arsenal.