Kjartan Henry Finnbogason hefur skrifað undir stuttan sex mánaða samning við Esjberg í næst efstu deild í Danmörku. Þjálfari liðsins er Ólafur Kristjánsson.
Kjartan rifti samningi sínum við Horsens fyrir helgi en bæði Valur og KR hafa áhuga á að fá hann í sínar raðir.
„Þegar ég var búinn að rifta fékk ég símtal frá Óla Kristjáns, ekki í fyrsta skipti. Hann reyndi að fá mig þegar hann var hjá Randers og líka þegar ég var í smá basli hjá Vejle. Ég átti fínt spjall við hann og sagði honum hvernig ég væri að hugsa þetta,“ sagði Kjartan Henry við Fótbolta.net eftir að hafa skrifað undir.
Ljóst er þó að Kjartan Henry er á heimleið en hann vildi ekki bara bora í nefið næstu vikur þegar verið er að pakka og flytja heim til Íslands.
„Tímabilið heima byrjar ekki fyrr en í byrjun maí. Ég vildi ekki bora í nefið í febrúar og mars á meðan við erum að pakka hérna úti og koma fjölskyldunni heim. Mér fannst spennandi að vinna með honum. Esbjerg er spennandi klúbbur sem á klárlega að vera í úrvalsdeildinni.“
Kjartan Henry er 34 ára gamall en Esjberg er í öðru sæti B deildarinnar í Danmörku, fyrir hjá félaginu er framherjinn Andri Rúnar Bjarnason.
