„Þessi töffaraskapur verður aldrei toppaður í íslenskri deildarkeppni. Að detta þetta í hug. Glerþakið brotið,“ skrifar knattspyrnusérfræðingurinn, Hjörvar Hafliðason á Twitter í dag og birtir myndband af skemmtilegri atvikum úr íþróttasögu Íslands.

Um atvikið sem er birt á Youtube segir. „KA maðurinn Baldvin Þorsteinsson á eitt allra eftirminnilegasta atvik í sögu íslensku deildarinnar. Tímabilið 2004-2005 lék hann með liði Vals og þegar Þórsarar mættu í heimsókn að Hlíðarenda þann 4. mars 2005 tók Baldvin sig til og tróð boltanum í körfu sem var við hliðarlínu vallarins. Baldvin uppskar beint rautt spjald fyrir framtakið en það kom ekki að sök í öruggum sigri Vals, 36-29 Dómarar leiksins, Guðjón Sigurðsson og Ólafur Örn Haraldsson, vissu ekki hvaðan á sig stóð veðrið og vísuðu Baldvini af leikvelli í tvær mínútur. En eftir að hafa rætt saman um málið sýndu þeir leikmanninum rauða spjaldið.“

Það sem vekur svo einnig athygli að þarna er Aron Einar Gunnarsson að spila með Þór, Aron er í dag þekktur fyri afrek sín á knattspyrnuvellinum. Hann hefur verið fyrirliði Íslands í fótbolta um langt skeið og átt magnaðan feril í atvinnumennsku.

Aron Einar tók þátt í þessum fræga leik og var aðeins 16 ára gamall, degi síðar mætti hann á U17 ára landsliðs æfingu í fótbolta. „Sérð mig þarna á miðjunni að stýra leiknum,“ skrifa Aron í svari til Hjörvars.

Lúka Kostic var þjálfari U17 ára landsliðsins á þessum tíma. „Daginn eftir fékk ég að heyra það frá okkar manni, Kostic.“

Kostic hafði komist af því að Aron hefði verið að keppa í handbolta. „Það var landsliðsæfing daginn eftir, fékk þá augnaráð frá Kostic “Hvað varst þú að gera í gær?“. Hann henti svo DV í grímuna á mér, mynd af mér með handbolta í hönd,“ sagði Aron um þetta skemmtilega mál.

Troðslu Baldvins úr þessum leik og klippuna af Aroni Einari að stýra liði Þórs má sjá hér að neðan.