Fylkir tilkynnti um félagaskiptin á Facebook-síðu sinni í dag. „Það er með mikilli eftirsjá og söknuði að við þurfum að tilkynna að Fylkir og Strømsgodset IF hafa náð saman um félagaskipti Valda,“ segir í tilkynningu félagsins. „Valdi hefur spilað vel undanfarin ár, náð að skemmta okkar stuðningsmönnum og með frammistöðu sinni vakið áhuga liða erlendis.“
Valdimar er fæddur árið 1999 og spilaði sinn fyrsta leik í meistaraflokki með Fylki árið 2016, þá var hann 17 ára gamall. Síðan þá hefur hann spilað 80 leiki og skorað 24 mörk. „Hjá Strømsgodset mun Valdi hitta fyrir Fylkismanninn og vin sinn Ara Leifsson sem seldur var þangað fyrr á árinu. Um leið og við samgleðjumst Valda að vera kominn í atvinnumennsku sem hann hefur dreymt um þá viljum þakka honum fyrir framlag hans til Fylkis á undanförnum árum og bjóðum velkominn heim á nýjan leik þegar ævintýrinu lýkur.“
