Mason Greenwood sóknarmaður Manchester United mætti til æfinga í gær, fyrsta æfingin eftir vandræði hans á Íslandi. Ensk blöð segja að framherjinn fái mikinn stuðning innan félagsins til að koma sér á lappir eftir mistökin í Reykjavík.
Fyrst um sinn þarf Greenwood hins vegar að æfa einn en félagið vill vera öruggt um það að framherjinn hafi ekki komist í tæri við kórónuveiruna eftir brot sitt á sóttvarnareglum í Reykjavík.
Ljósmyndarar fylgdu Greenwood á æfingu í morgun. Greenwood og Phil Foden brutu sóttvarnarreglur eins og frægt hefur orðið þegar þeir buðu tveimur íslenskum stúlkum í heimsókn á Hótel Sögu. Þeir voru reknir úr landsliðinu vegna þess.
Enskir ljósmyndarar munu að öllum líkindum fylgja Greenwood og Foden eftir næstu daga en málið sem DV greindi fyrst frá hefur vakið gríðarlega athygli í Bretlandi.
Manchester United hefur leik í ensku úrvalsdeildinni eftir rúma viku en Greenwood fær stórt hlutverk þar eins og síðustu leiktíð.
