Hödd Vilhjálmsdóttir almannatengill skrifar áhugaverðan pistil um málið sem tröllriðið hefur innlendum og erlendum fjölmiðlum undanfarið, um það að tveir ungir enskir landsliðsmenn áttu vingott við tvær íslenskar stúlkur á Hótel Sögu eftir landsleik Íslendinga og Englendinga í knattspyrnu. Leikmennirnir voru reknir úr enska landsliðinu enda var framferði þeirra brot á sóttvarnareglum.
Viðtal annarrar stúlkunnar, Láru Clausen, við Daily Mirror, hefur vakið feiknalega athygli, en DV greindir frá því fyrr í dag.
Hödd bendir á að hún vilji engan veginn dæma fjórmenningana, þau Láru Clausen, Nadíu Sif Líndal og ensku landsliðsmennina Grenwood og Foden fyrir framferði þeirra á Hótel Sögu. Hins vegar gerir hún athugasemdir við þá framgöngu að birta hálfgerða nektarmynd af Foden á netinu og greina frá hæfni hans í ástarlífi í víðlesnu blaði. Hún spyr hver viðbrögðin hefðu orðið ef karlmenn hefðu sýnt konum sama framferði. Hún segir: „Snúum dæminu við: Bretinn / Bretarnir hefðu myndað beran afturenda stúlkunnar, sett á samfèlagsmiðla og myndirnar þaðan farið á fjölmiðla og í keyrslu víða um heim. Annar þeirra hefði svo farið í viðtal í fjölmiðli og talað um hæfni hennar í kossadeildinni og upplýst alla heimsbyggðina um að hann hefði haft samfarir við stúlkuna.“
Hödd segir að karlar verðskuldi jafnmikla virðingu og konur en pistill hennar er eftirfarandi:
„Ég tek það strax fram að ég er ekki að dæma fjórmenningana þar sem að mér ferst það ekki og hef gert fleiri mistök í lífinu en ég nenni að telja. Það eru samt nokkrir hlutir sem mig langar til að benda á tengt þessu màli. Hér eru fjórir ungir einstaklingar að gamna sér. Tveir eru jú efnaðir, karlkyns og með sterkt bakland í gegnum atvinnu sína. Það breytir því þó ekki að þroski þeirra er líklega ekkert meiri en fólks á þessum aldri og þar með að öllum líkindum alveg jafn viðkvæmir og jafnaldrar þeirra – bæði kvenkyns og karlkyns. Eðlilega hefur verið tekið til varna fyrir stúlkurnar út af þessu máli og er það vel – ég hef gert það líka. Það er þó þannig að stúlkan / stúlkurnar myndaði til dæmis beran afturenda eins drengjanna og setti inn á samfèlagsmiðla fyrir einhverja vini sína til að sjá. Myndinni var, eins og flestir vita, komið á fjölmiðla og fór þaðan í dreifingu. Í ofanàlag er stúlkan í viðtali í breskum fjölmiðli þar sem hún greinir frá því að þau höfðu samfarir og að viðkomandi drengur kyssi mjög vel.
Snúum dæminu við: Bretinn / Bretarnir hefðu myndað beran afturenda stúlkunnar, sett á samfèlagsmiðla og myndirnar þaðan farið á fjölmiðla og í keyrslu víða um heim. Annar þeirra hefði svo farið í viðtal í fjölmiðli og talað um hæfni hennar í kossadeildinni og upplýst alla heimsbyggðina um að hann hefði haft samfarir við stúlkuna.
Mig grunar að það þætti ekki jafn lèttvægt og það er að mínu mati bara alls ekkert sanngjarnt. Karlmenn, hvað þá ungir, eiga engu minni virðingu skilið en konur.“
