Landsliðsmaðurinn Birkir Már Sævarsson, sem leikur með Val í Pepsi Max-deildinni, leitar að ökumanni sem keyrði aftan á dóttur hans. Birkir auglýsir eftir ökumanninum á Twitter-síðu sinni.

Ökumaðurinn sem um ræðir var, samkvæmt Birki á ljósbláum bíl af gerðinni KIA Soul. „Ef þið sjáið ljósbláan KIA Soul með V í númerinu sem er beyglaður að framan þá er það sennilega ræfillinn sem keyrði aftan á dóttur mína og skildi hana eftir grátandi og í sjokki á miðri Snorrabraut,“ segir Birkir í tísti sínu um ökumanninn. „Ökumaðurinn var með dökkt krullað hár, með hatt og berfættur. Ef einhver kannast við kauða þá má endilega láta mig vita.“

Maður nokkur hvetur Birki til að tilkynna atvikið til lögreglu í athugasemd. „Við erum búin að því,“ segir Birkir og bætir við að málið sé í ferli. „Bara óþolandi að hinn ökumaðurinn þurfi ekki að bera ábyrgð á gjörðum sínum ef hann finnst ekki.“ Þá spyr annar hvort það sé í lagi með dóttur hans. „Já, bara smá verkur í hálsinum og bakinu en ekkert alvarlegt,“ segir Birkir.

Annar notandi gefur Birki góð ráð sem nýta má þegar maður lendir í svona aðstæðum. „Fara til læknis og fá vottorð og tilheyrandi. Bak- og hálsmeiðsli get verið mjög leiðinleg, og komið upp aftur.“