Hannover, sem leikur í 2. deild Þýskalands, virðist hafa mikinn áhuga á landsliðsmanninum Guðlaugi Victori Pálssyni. Hannover er búið að leggja fram tilboð upp á 500 þúsund evrur, eða um 80 milljónir króna, í Guðlaug. Morgunblaðið greinir frá þessu.

Guðlaugur er samningsbundinn liðinu Darmstadt, sem leikur einnig í 2. deild Þýskalands, og hefur hann gert góða hluti með þeim. Til að mynda var hann valinn besti leikmaður tímabilsins hjá liðinu.

Samningur Guðlaugs við Darmstadt rennur út árið 2022 en hann kom til liðsins árið 2018. Síðan þá hefur hann leikið 46 leiki með liðinu og skorað þrjú mörk.