„Ég og Miley Cyrus áttum ógleymanlega lyftuferð um daginn í Odense. Það verður seint toppað á minni ævi,“ segir Teitur Magnússon 19 ára leikmaður OB í Danmörku við Fótbolta.net en pilturinn ungi úr Hafnarfirði flutti til Danmerkur á síðasta ári.

Teitur er búsettur Óðinsvé en hann var a hóteli þar í borg þegar hann rakst á þessa stórstjörnuna í lyftu. „Ég var að hjálpa mömmu að fara niður með farangurinn, og stóð að bíða eftir lyftunni. Lyftudyrnar opnast og þar stendur Miley Cyrus með mömmu sinni,“ sagði Teitur sem átti í samskiptum við stjörnuna.

Atvikið átti sér stað á síðasta ári þegar Miley var að skilja við Liam Hemsworth og systur Teits eru nokkuð vissar um að Miley hafi hrifist af honum.

„Þetta var á sama tíma og hún var að skilja við Liam og var að spila á tónleikahátíð í Danmörku. Systur mínar eru nokkuð vissar um að hún hafi verið að reyna við mig en ég ætla að leyfa mér að draga það í efa. Hún er samt bæði sætari og minni en ég bjóst við,“ sagði Teitur í ítarlegu viðtal i við Fótbolta.net.