Sólveig Anna Jónsdóttir formaður Eflingar gagnrýnir það að Katrín Jakobsdóttir forsætisráðherra hafi fagnað sigri Liverpool í ensku úrvalsdeildinni í gær og birt af því mynd.

Sólveig skrifar harðorðan pistil á Facebook í kvöld og segir að ef forsætisráðherra hafi frekar átt að setja inn færslu um þann harmleik sem átti sér stað í Reykjavík í gær þegar þrír létust í eldsvoða.

Finally! Congratulations my dear boys and Klopp and to us all! Lets all remember to keep walking on with hope in our hearts! #YNWA pic.twitter.com/lADvH4tT4r

— Katrín Jakobsdóttir (@katrinjak) June 25, 2020

Sólveig byrjar pistil sinn á Facebook svona. „Kannski er óviðeigandi af mér að vera að pæla í þessu eða skrifa um þetta hér en ég ætla samt að gera það. Að sjálfsögðu má forsætisráðherra skrifa færslu á Twitter um áhugamál sín en í ljósi atburða gærdagsins hefði verið eðlilegra að háttsettasta stjórnmálamanneskja lýðveldisins skrifaði færslu um þann harmleik sem átti sér stað, ef hún á annað borð var að nota Twitter,“ skrifar Sólveig Anna

Sólveig telur að Katrín hafi frekar átt að ræða um skelfilegt ástand sem sé undir fallegu yfirborði á Íslandi: „Mér finnst ekki við hæfi að forsætisráðherra birti færslu um fótboltaleik þegar að fólk er slasað og í lífshættu eftir skelfilegan eldsvoða, en þannig var staðan í gærkvöldi, og þegar slökkviliðsfólk hefur lagt sig í mikla hættu við að reyna að bjarga þeim sem föst voru inn í húsinu. Ég tel að það væri betra og raunverulega við hæfi eftir atburði sem þessa að fólk sem fer með völd léti okkur vita að það skildi að undir fallegu yfirborði þessa lands eru skelfileg samfélagsleg vandamál sem hafa fengið að grassera meira og minna óáreitt. Það er svo löngu tímabært að það gerist.“

Hún segist hafa fengið nóg af yfirborðskenndri stemmingu. „Þessvegna leyfi ég mér hér að gagnrýna myndbirtinguna og áhersluna sem hún sýnir. Ég er komin með nóg af yfirborðskenndri stemmningu um að við séum öll í þessu saman og að allt sér hér frábært. Ég vil að við fókuserum á og tölum um það sem máli skiptir. Það er löngu tímabært.“

Facebook

Twitter

Linkedin