Frank Lampard stjóri Chelsea ákvað að minna Jurgen Klopp stjóra Liverpool á að hann hafi verslað rándýra leikmenn til að ná árangri hjá Liverpool.
Klopp lét hafa eftir sér á dögunum að Liverpool væri ekki á sama stað og Chelsea, félagið væri ekki með eiganda sem dældi peningum inn í félagið til að kaupa leikmenn. Chelsea hefur eytt rúmlega 200 milljónum punda í sumar á meðan flest félög hafa litla fjármuni í eyðslu vegna kórónuveirunnar.
„VIð lifum í heimi þar sem er óvissa, sum félög upplifa þetta ekki og treysta á eigendur sína,“ sagði Klopp.
Lampard segir þetta ódýra leið til að skjóta á Chelsea. „Flest félög vinna deildina í dag með því að fjárfesta, fyrir utan Leicester,“ sagði Lampard.
,,Þú getur farið í gegnum leikmannahóp Liverpool. Van Dijk, Allisson, Fabinho, Keita, Mane, Salah. Allt frábærir leikmenn sem voru mjög dýrir. Liverpool hefur verið að eyða.“
„Við vorum í félagaskiptabanni og reynum að bæta í hóp okkar núna. Liverpool hefur keypt dýra leikmenn, við vitum að þeir hafa frábæran þjálfara og frábæra leikmenn. Saga Liverpool er góð en þeir hafa eytt stórum fjárhæðum.“
