Arsenal og Manchester City kepptu í undanúrslitum FA bikarsins í dag. Pierre Emerick Aubameyang kom Arsenal snemma yfir eftir fyrirgjöf frá Nicolas Pepe. Þrátt fyrir að hafa spilað mikinn sóknarbolta þá náði Man. City ekki að koma boltanum framhjá Emiliano Martinez sem stóð vaktina í markinu. Aubameyang skoraði síðan annað mark þegar tæpar 20 mínútur voru eftir af leiknum og reyndist það vera síðasta mark leiksins.

Jamie Carragher, fyrrum leikmaður Liverpool og fótboltalýsandi, hrósaði Arteta á Twitter síðu sinni eftir leikinn. „Þegar Arteta mætti til Arsenal bjuggust allir við því að sjá Pep Guardiola fótbolta í hverri viku,“ sagði Carragher en Arteta var aðstoðarþjálfari með Guardiola hjá City. „Arsenal eru ekki en komnir með leikmennina fyrir það svo hann er búinn að breyta forminu að sínum hugmyndum með þeim árangri að sigra tvö bestu lið landsins á fjórum dögum. Það er frábær stjórnun.“

Í úrslitaleiknum mun Arsenal mæta annað hvort Manchester United eða Chelsea en seinni undanúrslitin fara fram á morgun.