Leikmaður Stjörnunnar í meistaraflokki karla hefur greinst með kórónuveiruna. Þetta staðfestir Stjarnan í kvöld.

Samkvæmt heimildum 433.is var Stjörnuheimilinu lokað í kvöld en allt verður sótthreinsað á morgun og fólki er meinað að mæta á svæðið.

Allt karlalið Stjörnunnar fer nú í sóttkví vegna málsins samkvæmt heimildum 433.is en umræddur leikmaður var á æfingu liðsins í gær og ljóst að liðið leikur ekki næstu vikurnar.

Leikmaðurinn deildi búningsklefa með leikmönnum liðsins í gær en fundað er um málið hjá Stjörnunni þessa stundina.

Í gær var staðfest smit hjá kvennaliði Breiðabliks og hafa tæplega 300 einstaklingar farið í sóttkví vegna þess.

Yfirlýsing UMF Stjörnunnar:
„Nú í kvöld bárust fregnir af því að leikmaður karlaliðs Stjörnunnar í knattspyrnu er smitaður af Covid-19. Sökum þess hefur verið ákveðið að allar æfingar sem fara áttu fram á svæði knattspyrnudeildar Stjörnunnar á morgun falla niður þar sem starfsmenn félagsins munu sótthreinsa félagsaðstöðuna. Umf Stjarnan mun vinna náið með Almannavörnum og KSÍ á næstu klukkutímum og kappkosta við það að koma frekari upplýsingum á framfæri þegar að þær liggja fyrir”