KR fer í Kópavoginn í kvöld og spilar við öflugt lið Breiðabliks í Pepsi-max deild kvenna. Leikurinn leggst vel í þjálfara KR-inga Jóhannes Karl Sigursteinsson. „Þetta er frábært lið og við þurfum að mæta mjög agaðar og skipulagðar og tilbúnar að vinna mikla vinnu. Við þurfum að vera duglegar varnarlega. Þær eru með feikilega sterkt sóknarlið og eru í raun sterkar alls staðar á vellinum.“ Jóhannes segir að sitt lið verði að nýta sína styrkleika. „Við erum með sterkt lið og okkar styrkleikar felast í því að halda bolta. Ef við náum að spila okkar leik og halda í boltann þá munum við finna opnanir í vörn Blika.“
Jóhannes Karl segir að sitt lið verði að verjast sem lið og loka svæðum varnarlega, þá séu þær alltaf líklegar til þess að skora mörk. „Það hefur ekki gengið sérstaklega að skora og það hefur gengið enn verr að verjast, við höfum fengið á okkur sex mörk í fyrstu tveimur leikjunum.“
Breiðablik skoraði tvö mörk í síðasta leik eftir langt innkast frá Sveindísi Jane. Jóhannes er búinn að fara yfir það með sínum stelpum. „Við erum búin að fara yfir löngu innköstin hjá þeim og mætum klárar í það. Þær eru mjög grimmar í föstum leikatriðum þannig að við þurfum að mæta grimmdinni í þeim.“
Jóhannes segir að það hafi gengið ágætlega að púsla saman nýju liði þrátt fyrir að hafa tapað fyrstu tveimur leikjunum. „Það er margt jákvætt í okkar leik sem við þurfum að vinna áfram með og byggja á því. Við erum með sterkan leikmannahóp og háleit markmið sem hafa ekkert breyst. Við viljum vera fyrir ofan miðju og bæta þann árangur sem við höfum verið að ná undanfarin ár.“
Gæðin í fyrstu umferðunum hafa komið Jóhannesi á óvart. „Við renndum blint í sjóinn með þessum undirbúning í ár, mér finnst gæðin í þessum fyrstu leikjum hafa verið góð þrátt fyrir undirbúninginn.“
Þriðja umferð í efstu deild kvenna hefst í kvöld með þremur leikjum. Breiðablik tekur á móti KR, Selfoss fer í heimsókn í Kaplakrika þar sem þær spila við FH og Fylkiskonur fá Þrótt í heimsókn. Allir leikirnir hefjast klukkan 19:15.
Umferðin klárast á morgun. ÍBV tekur á móti Stjörnunni á Hásteinsvelli og Valur tekur á móti Þór/KA. Þessir leikir hefjast klukkan 18:00.
Fjögur lið eru með sex stig eftir fyrstu tvo leikina, Þór/KA, Breiðablik, Valur og Fylkir. Stjarnan og ÍBV eru bæði með þrjú stig og má því búast við hörku leik í Eyjum á morgun. Þróttur, Selfoss, KR og FH eru öll stigalaus.
Breiðablik – KR
FH – Selfoss
Fylkir – Þróttur R.
ÍBV – Stjarnan
Valur – Þór/KA
