Knattspyrnufélagið Burnley hefur gefið út tilkynningu eftir atvik sem kom upp fyrir leik liðsins við Manchester City í kvöld.

Borði með skilaboðunum ‘White Lives Matter Burnley’ flaug yfir Etihad og virtist þar með gera lítið úr Black Lives Matter herferðinni sem er í gangi um allan heim.

Burnley mun vinna með yfirvöldum til þess að finna þá aðila sem standa á bakvið verknaðinn.

,,Knattspyrnufélagið Burnley fordæmir þessa hegðun og borðann sem flaug yfir Etihad völlinn á mánudagskvöld,“ sagði í tilkynningunni.

,,Við viljum koma því á framfæri að þeir sem standa á bakvið verkið eru ekki velkomnir á Turf Moor.“

,,Við munum vinna með yfirvöldum til þess að finna þá sem bera ábyrgð á verkinu og dæma þá í lífstíðarbann.“

,,Við stöndum fullkomlega með herferð ensku úrvalsdeildarinnar þegar kemur að Black Lives Matter-hreyfingunni og allir okkar leikmenn og starfsfólk tóku þátt í upphafi leiks.“

,,Við biðjum ensku úrvalsdeildina, Manchester City og alla þá sem taka þátt í baráttunni afsökunar.“