Eiður Smári Guðjohnsen, fyrrum landsliðsmaður, var gestur í þættinum Á bekknum með Einari Erni á Rás 2 í dag.

Eiður er landsþekktur en hann er af mörgum talinn besti knattspyrnumaður Íslands frá upphafi.

Árið 1994 gekk eiður í raðir PSV Eindhoven í Hollandi og var þar í fjögur ár áður en slæm meiðsli settu strik í reikninginn.

Eiður var áður á mála hjá Val hér heima en fór erlendis eftir að hafa hrifið Frank Arnesen, njósnara, á alþjóðlegu móti.

Pressan var mikil á Eið en Arnesen lýsti honum sem efnilegasta leikmanni Evrópu á þessum tíma.

,,Það kemur þannig til að ég fer með yngri landsliði, undir 16 ára, áður en Íslandsmótið byrjar og spila á alþjóðlegu móti og er valinn bestur. Það er erfitt að segja það sjálfur en ég var langbestur á því móti,“ sagði Eiður.

,,Þá er Dani, sem við köllum Íslandsvin, sem heitir Frank Arnesen, hann spilaði með pabba í Anderlecht og átti frábæran feril. Hann var með útsendara á þessu móti og hringir í pabba og segir: ‘Ég verð að fá strákinn þinn, við erum félagið fyrir hann og gerum allt fyrir hann. Ég er búinn að kaupa efnilegasta leikmann veraldar og nú þarf ég að fá efnilegasta leikmann Evrópu,’ sagði Arnesen en PSV krækti einnig í brasilíska undrið Ronaldo.

,,Út frá því fer ég í heimsókn til þeirra. Hollendingar eru sérvitir og erfiðir en það hjálpaði mér að alast upp í Belgíu, ég talaði tungumálið og einhvern veginn með skemmtilega mikið sjálfstraust og tek á þessu. Svo kláraðist þetta bara.“