Indriði Sigurðsson, fyrrum landsliðsmaður, var gestur í hlaðvarpsþættinum Draumaliðið í gær og ræddi þar ýmis mál við Jóa Skúla, þáttastjórnanda.
Indriði átti mjög farsælan feril sem atvinnumaður og lék lengst með Viking í Noregi frá 2009 til 2016.
Sem unglingur fór Indriði til að mynda á reynslu hjá Liverpool en hann hóf ferilinn með KR hér heima.
Nokkur lið sýndu Indriða áhuga og fór hann einnig til Hollands og æfði með stórliði PSV Eindhoven.
,,Þetta er minni heimur en við höldum. Tveimur árum áður þá spilaði 16 ára landsliðið leik í Finnlandi og þá var PSV að scouta. Þá vildu þeir fá mig en það leið einhvern veginn ár eftir að það gerðist,“ sagði Indriði um ævintýrið.
,,Þeir sögðu við mig að ég væri eins og Phillip Cocu. Ég var á miðjunni, örvfættur og eitthvað svona. Svo gerist ekkert í ár, áður en ég fór í Liverpool þá fór ég þangað. Luka Kostic var með einhverja tengingu þarna út og þetta er ekki flóknara en það. Mér var boðið út á trial í gegnum Luka.“
Indriði ræddi svo tímann hjá Liverpool en hann fékk að hitta stórstjörnur á æfingasvæði félagsins.
Indriði sá einnig Steven Gerrard spila sinn fyrsta leik en hann er algjör goðsögn á Anfield.
,,Það sem var svo geggjað er að fyrst vissu þeir ekki alveg hvar þeir áttu að setja mig og fyrstu vikuna æfði ég með aðalliðinu. Þarna voru Jamie Redknapp, Steve McManaman, Michael Owen, Robbie Fowler og Brad Friedel var þá og allir Norðmennirnir. Haukur Ingi var þarna þá. Þeir voru allir mega nice.“
,,Þeir sjá bara einhvern pjakk koma inn og don’t feel threatened. Svo æfirðu með 17 ára liðinu, ég man hjá PSV ég sá bara að þeir voru að tala um mig og benda: ‘þessi þarna fáviti.’ Svo æfði ég með varaliðinu þar og það var ekkert þannig. Þetta voru bara óöruggir strákar og þarna er einhver kominn inn til að taka sætið af vini þínum eða þér.“
,,Ég horfði á leik hjá U19 liði Liverpool og þá var Steven Wright og Gerrard þar líka. Ég fór út tvisvar. Ég var í rúmlega mánuð þarna og ég sá fyrsta leikinn sem Gerrard spilaði. Ég tók eftir honum í 19 ára liðinu klárlega.“
