Kristinn Steindórsson komst loksins á blað eftir langa markaþurrð í 3-0 sigri Breiðabliks á Gróttu í gær. Kristinn kom frá FH fyrir mót en hann var áður hjá Blikum og hélt svo út í atvinnumennsku.

Kristinn fann sig ekki hjá FH og vildi félagið ekki halda honum, Kristinn er mættur heim í Kópavoginn og markið sem hann skoraði í gær var glæsilegt. ,,Það er bara mjög góð tilfinning og ekki slæmt að byrja hana svona með sigri. Fyrsti leikurinn er alltaf erfiður og það er auðvelt að misstíga sig þó að þetta sé leikur sem við eigum að klára á pappír,“ sagði Kristinn eftir leik í gær.

Mikael Nikulásson þjálfari Njarðvíkur ræddi innkomu Kristins í Dr. Football í morgun. „Kiddi Steindórs er frábær í fótbolta og ef Óskar nær hausnum í lag, hann kom inn gegn Gróttu og skoraði. Það verður allt vitlaust, come on. Hann þarf að koma inn gegn Val og skora, allt Blika samfélagið fór á hliðina því hann kom og skoraði gegn Gróttu,“ sagði Mikael.

Mikael segir það gott fyrir sjálfstraust Kristins að skora í fyrsta leik og að innkoma hans geti breytt miklu fyrir Blika, finni hann gamla formið.

„Frábært fyrir hann og sjálfstraustið, skoraðu tvö gegn Val. Hann er fær til þess, hann var með takta. Ef hann nær sér á strik, ef hann nær að skora 8-10 mörk og spilar sinn leik. Þá getið þið rétt ímyndað ykkur hvað hann styrkir þá mikið.“