Marcus Rashford framherji Manchester United lætur að sér kveða utan vallar þessa dagana og berst fyrir því að börn á Englandi þurfi ekki að upplifa svengd. Á meðan kórónuveiran lokaði öllum skólum í Bretlandi fór Rashford að sjá til þess að börn yrðu ekki svöng þegar þau gátu ekki farið í skólann og fengið mat.

Mörg börn í Bretlandi treysta á heita máltíð í skólanum en Rashford safnaði 20 milljónum punda til að fæða börn sem ekki eiga vel stæða foreldra.

Rashford sjálfur kemur af heimili þar sem lítið var um fjármuni og mamma hans þurfti að berjast við því að Manchester United tæki hann ári fyrr inn í félagið. „Ríkisstjórnin hefur gert allt til þess að bjarga efnahagmálum þjóðarinnar, í dag bið ég ykkur um að ganga lengra og halda utan um öll börn sem eru í vandræðum,“ skrifar Rashford í opnu bréti til embætismanna.

Rashford vill að ríkisstjórnin tryggi að börn sem komu af heimilum þar sem lítið er til fái einnig að borða í sumarfríi sínu. „Ég skora á ykkur að finna auðmýkt hjá ykkur, ég bið ykkur að endurskoða þá ákvörðun að hætta að gefa börnum mat yfir sumartímann. Tryggið að þetta haldi áfram,“

„Þetta er England árið 2020 og þetta er mál sem verður að leysa. Öll augun beinast að ykkur, tryggið líf þessara krakka sem ganga í gegnum erfiða tíma.“