Kristján Gauti Emilsson er að ganga í raðir FH. Fótbolti.net sagði frá þessu í gær samkvæmt heimildum og 433.is hefur síðan fengið þetta staðfest.

Kristján Gauti hætti í knattspyrnu árið 2016 þá 23 ára gamall þegar hann lék með NEC í Hollandi

Kristján getur spilað sem framherji eða framliggjandi miðjumaður en hann er 27 ára gamall í dag. Á besta aldri en hefur ekkert spilað í fjögur ár.

„Ég hef heyrt þetta að Kristján Gauti sé að taka fram skóna, þetta er saga sem ég hef heyrt. Guð hjálpi manni að taka fram skóna eftir fjögur ár í dvala,“ sagði Guðmundur Benediktsson í fyrradag.

Kristján Gauti hafði mætt á æfingar hjá Stjörnunni og þegar FH frétti af áhuga Kristjáns á að snúa aftur á völlinn var félagið fljótt til og hafði samband. Þessi uppaldi FH-ingur ætlar því að rífa fram skóna og hjálpa félaginu sem stefnir aftur á toppinn.

Búist er við að FH staðfesti komu Kristjáns í dag eða á morgun en hann verður þó líklega ekki leikfær gegn HK á sunnudag.