Það vakti furðu margra þegar Herði Magnússyni var sagt upp á Sýn á síðasta ári en Hörður hafði verið einn ástsælasti íþróttafréttamaður landsins til margra ára. Lýsingar hans á kappleikjum og Pepsi mörkin undir hans stjórn nutu mikilla vinsælda. Hörður hefur verið utan sviðsljóssins síðustu mánuði en hann snýr aftur á skjáinn á morgun þegar hann lýsir leik Werder Bremen og Frankfurt í þýsku úrvalsdeildinni.
Leikurinn er sýndur á Viaplay og mun Hörður sjá um lýsingar fyrir efnisveituna á næstu dögum og vikum. „Get staðfest þetta. Mjög spennandi og hlakka til þess að takast á við þetta. Þetta á sér nokkuð langan aðdraganda með Viaplay og tel þetta vera rétt skref á mínum ferli. Á nóg eftir,“ skrifar Hörður á Facebook í dag og ekki hefur staðið á viðbrögðum.
Fjöldi fólks fagnar þessu enda hefur ástríða Harðar fyrir fótboltanum skilað sér stofur landsmanna um langt skeið. „Great signing – STAÐFEST,“ skrifar Helgi Seljan fréttamaður á RÚV. „Tími til kominn…Flottur,“ skrifar Þorsteinn Magnússon einn af öflugri markmannsþjálfurum landsins.
„Frábærar fréttir. Til hamingju og gangi þér allt í haginn,“ skrifar Guðmundur Hilmarsson sem var lengi vel blaðamaður á Morgunblaðinu.
Gunnar Leó Helgason fagnar þessu. „Frábærar fréttir og til lukku með þetta Hörður Magnússon. Það vænkast hagur okkar sjónvarpsglápara.“
„Loksins. Loksins aftur fótbolti og Höddi Magg í lífi okkar,“ skrifar Magnús Sigurðsson.
Sjónvarpsstjarnan fyrrverandi Ásgeir Erlendsson fagnar þessu. „Innilega til hamingju Höddi!.“