Kári Árnason sem hefur átt fast sæti í íslenska landsliðinu síðustu ár gerir upp ferill sinn í Draumaliðinu hjá Jóa Skúla.
Kári velur draumalið sitt af ferlinum en hann ræðir einnig um ferilinn í heild. Hann fer yfir Steve Evans sem var stjóri hans í Rotherham frá 2012 til 2015.
Evans er umdeildur karakter í enska boltanum en hann ákvað að pissa í vask sinn á hverjum degi. „Ég hefði ekki skipt þessum tíma út fyrir neitt í dag, en þegar þú ert í þessari stöðu þá er þetta ekki gaman. Óneitanlega gaman í rútunni, þegar þú ert með bilaðan einstakling þá hópast allir saman um eitt. Allir í liðinu þola ekki stjórann, hann verður miðpunktur athygli og allra brandara,“ sagði Kári um Evans.
Evans nennti ekki á klósettið í lok dag og skvetti úr skinnsokknum í vask sinn á skrifstofunni. „Hlutirnir sem hann gerði, það var rör tengt úr vaskinum fór inn í sturtuna hjá okkur. Það fór í niðurfallið í sturtunni, hann var oftast seinastur heim. Alltaf áður en hann fór heim þá nennti hann ekki að labba á klósettið, hann pissaði í vaskinn. Það lak inn í sturtuna og hlandlyktin tók á móti okkur daginn yfir.“
Evans las yfir leikmönnum ef þeir gerðu mistök. „Ef við vorum undir að þá var það hárblásari á næsta stigi, ef menn gerðu mistök þá hraunaði hann yfir þá. Frussandi hárblásari, oftast var þetta í hitanum. Hann henti mönnum undir rútuna í fjölmiðlum.“
