Fram kemur í Fréttablaðinu í dag að staðan sé svört hjá meistaraflokkum Selfoss. Félagið á von á því að tekjutap félagsins verði 42 milljónir næstu tvö árin vegna kórónuveirunnar.
Um er að ræða tekjutap í meistaraflokki en karlalið Selfoss í fótbolta leikur í 2. deild en kvennaliðið í Pepsi Max-deild kvenna. Félagið heldur svo úti öflugum meistaraflokkum í handbolta.
Félagið hefur farið fram á samtal við bæjarstjórn Árborgar til að ræða stöðuna og hvort möguleiki sé á stuðningi. „Tekjutap félagsins er mest í handog fótbolta. Áætlað núna fyrir árið er 10-15 milljónir á hvora deild og þá erum við ekki að gera ráð fyrir framtíðartekjum þar sem við í rauninni rennum blint í sjóinn. Styrktaraðilar á næsta ári, maður veit ekki hvað gerist þar. Ferðaþjónustufyrirtæki hafa verið okkur mikilvæg og þau gætu þurrkast út,“ sagði Gissur Jónsson, framkvæmdastjóri Ungmennafélags Selfoss við Fréttablaðið.
Selfoss hefur sett mikla fjármuni í fótboltann sinn síðustu ár. Það hefur borið árangur í kvennaflokki þar sem liðið varð bikarmeistari á síðasta ári en karlalið félagsins komst ekki upp úr 2. deildinni síðasta sumar.
