Íþróttafréttamaðurinn Hörður Magnússon var gestur í hlaðvarpsþættinum Spekingar Spjalla sem kom út á fimmtudaginn.

Hörður er Íslendingum kunnur en hann var lengi frábær knattspyrnumaður og fór síðar í heim fjölmiðla.

Hörður hefur lengi verið eitt helsta andlit Stöðvar 2 og Sýn og er landsmönnum kunnur á skjánum.

Hörður hefur þó fengið gagnrýni fyrir að æsa sig of mikið í sjónvarpinu og þá aðallega yfir knattspyrnuleikjum.

Hann segir að æsingurinn sé alveg raunverulegur og að um engar ýkjur séu að ræða.

Hljóðbrot af Herði lýsa leik Keflavík og Fram var spilað í þættinum en þar gat Keflavík tryggt sér titilinn með sigri í lokaumferðinni.

,,Ég hef alltaf haft þá trú að ég hafi aldrei æst mig til að æsa mig. Augnablikið þarf að koma sjálft til þín, ekki láta það gerast,“ sagði Hörður.

,,Í þessu tilfelli, ég var í nákvæmlega sömu stöðu með FH 1989 að vera í lokaleik á heimavelli og verða meistari með sigri. Við töpuðum.“

,,Þegar ég kem til Keflavíkur 1-2 tímum fyrir leik þá skynja ég að menn eru mjög taugaóstyrkir. Ég segi við Magga Gylfa sem var að lýsa með mér að Keflavík væri aldrei að fara að vinna þennan leik.“

,,Svo ná þeir forystu, Fram jafnar og svo kemur þetta sigurmark sem var auðvitað sensation því Keflavík hafði verið með forystuna í þessu móti. Framararnir eru að tryggja sér Evrópusæti þarna undir stjórn Todda Örlygs. Það var mikið undir hjá þeim.“

,,Ég fór aldrei inn í lýsingu og hugsaði: ‘nú ætla ég að trompast’ – það var fræg lýsing eða frægur leikur Tottenham – Manchester City á White Hart Lane, 3-0 í hálfleik fyrir Tottenham í FA Cup og Árni Gautur Arason í markinu hjá City.“

,,Joey Barton er rekinn af velli undir lok fyrri hálfleiks þannig City spilar seinni hálfleik manni færri, þremur mörkum undir en þeir vinna leikinn. Það er oft bara augnablikið. Þetta er eins og þegar Gummi Ben er að lýsa í Frakklandi. Þetta ræðst oft á réttur maður á réttum stað. Þetta augnablik var eitt af þeim eftirminnilegustu í minni lýsingarsögu. Ég fór aldrei með það hugarfar að nú ætlaði ég að segja eitthvað ógeðslega sniðugt eða trompast svo þjóðin heyri.“