Paul Pogba miðjumaður Manchester United vill ólmur komast inn á völlinn á nýjan leik og gæti spilað gegn LASK í Evrópudeildinni á morgun. Pogba hefur ekkert spilað á þessu ári en meiðsli hafa hrjáð kappann síðustu mánuði.

Miðjumaðurinn og umboðsmaður hans, Mino Raiola hafa ekki farið í felur með það að Pogba vilji fara frá United. Það virðist hins vegar vera breyting á. Daily Mail fullyrðir í dag að Pogba sjái framtíð sína hjá United, hann hefur hrifist af leik liðsins eftir að Bruno Fernadnes kom til félagsins.

Fernandes hefur breytt leik United og virðist Pogba sjá fram á bjartari tíma, Daily Mail segir að Pogba hafi áhuga á að skrifa undir nýjan samning.

,,Það er mikið sagt og skrifað um Paul, við ræðum hans málefni innan veggja félagsins,“ sagði Solskjær sem sagði að framtíð hans væri meðal annars til umræðu.

,,Um leið og hann er heill heilsu, þá er hann nógu góður til að spila fyrir okkur. Ég er viss um að Paul sé spenntur fyrir því að snúa aftur, Paul veit að hann þarf að leggja mikið á sig til að komast í sitt besta form. Hann hefur verið lengi frá.“