Manchester United 2-0 Manchester City
1-0 Anthony Martial(30′)
2-0 Scott McTominay(90′)
Manchester United vann gríðarlega mikilvægan sigur í ensku úrvalsdeildinni í dag er liðið mætti Manchester City.
United er í harðri baráttu um Meistaradeildarsæti og var sex stigum frá Chelsea fyrir leikinn í dag.
Chelsea lagði Everton 4-0 en United tókst að svara og lagði grannana sína 2-0 á Old Trafford.
Leikurinn var ágætis skemmtun en tvö mörk voru skoruð og það voru heimamenn sem gerðu þau bæði.
Anthony Martial skoraði fyrra markið á 30. mínútu eftir laglega aukaspyrnu Bruno Fernandes. Ederson í marki City hefði þó mátt gera betur.
Ederson gerði sig svo sekan um önnur mistök í uppbótartíma er hann henti boltanum á Scott McTominay sem þakkaði pent fyrir sig og skoraði í autt markið af löngu færi.
United er nú í fimmta sætinu og var að vinna City í annað sinn á tímabilinu.
