Berglind Björg Þorvaldsdóttir, landsliðskona í knattspyrnu má lítið gera næstu vikurnar. Yfirvöld á Ítalíu hafa ákveðið að loka Lombardy héraðinu þar sem Berglind býr, ástæðan er COVID-19 veiran sem nú herjar á Evrópu. Veiran hefur herjað hvað verst á Ítalíu og það svæði þar sem Berglind býr, mikill fjöldi fólks hefur látið lífið. Fólki er skipað að fara í sóttkví og framhaldið er óvíst.

Berglind gekk í raðir AC Milan í janúar á láni frá Breiðabliki, næstu vikur verða skrýtnar þar sem héraðið hefur verið sett í sóttkví. ,, Eins og flestir vita þá bý ég á Lombardy svæðinu á Ítalíu sem var lokað í gærkvöldi útaf kórónuveirunni. Komandi frá Íslandi og Vestmannaeyjum, þá er ég í fyrsta skipti með innilokunarkennd. 16 milljónir íbúa lokaðir inni og ekkert hægt að fara…,“ skrifar Berglind á Facebook í kvöld.

Berglind hefur ekki mátt tjá sig um málið en skrifar færslu á Facebook í dag. ,,En það eru ótrúlega margir búnir að senda mér skilaboð og tjékka stöðuna á mér sem ég er mjög þakklát fyrir. Við leikmennirnir hjá AC Milan höfum lítið fengið að tjá okkur um þetta mál og allir þeir fréttamenn sem hafa haft samband við mig fá lítið sem ekkert upp úr mér, þannig ég fékk leyfi til þess að skrifa smá hérna.“

Berglind finnur ekki fyrir neinum einkennum en henni var bannað að mæta í verkefni íslenska landsliðsins, vegna veirunnar.

,,Ég hef ekki fundið fyrir neinum einkennum og er góð. Þetta er ótrúlega skýtin staða að vera í. En við fáum skýr skilaboð á hverjum degi hvað má og hvað má ekki. Varðandi landsliðið, þá var það hundleiðinlegt. En ég virði alla þá ákvörðun sem þau tóku með því að skilja mig eftir.“

,,Annars segi ég bara ást&friður, og öllum er velkomið að hringja í mig því ég hef ágætis tíma núna.“