Óskar Hrafn Þorvaldsson, þjálfari Breiðabliks, ræddi við strákana í hlaðvarpsþættinum Fantasy Gandalf í dag.

Þar fór Óskar yfir ýmis mál og á meðal annars æfingaferð Breiðabliks til Svíþjóðar í síðasta mánuði.

Talað var um það í febrúar að tveir leikmenn Breiðabliks hafi verið ósáttir við að Óskar hafi ferðast til Danmerkur til að hitta eigin fjölskyldu í miðri ferð.

Aðrir voru eitthvað ósáttir við útivistartímann í Svíþjóð og fór Óskar yfir öll þessi mál í þættinum í dag.

,,Ég held að þetta hafi verið tekið úr samhengi að einhverju leyti en þetta er þannig að leikmenn hafi ekki haft neina sérstaka skoðun um hvort ég færi eða ekki,“ sagði Óskar.

,,Ég held að einhverjir hafi viljað vera lengur úti og skemmta sér. Ég held að einhverjir hafi viljað rýmra svigrúm til að vera fullorðnir og sjálfstæðir, að þeir gætu sjálfir tekið ákvörðun um hvenær væri hollt að fara heim.“

,,Ég held í grunninn að ef þú myndir spyrja alla leikmenn Breiðabliks þá myndu þeir segja að þetta væri bara flott og eðlilegt. Akkúrat þarna voru einhverjir fúlir yfir því að það væri einhver vinstri græn forsjárhyggja að setja útivistartíma og þetta endaði svona.“

,,Ég þekki ekki hvernig miðbær Stokkhólms virkar en í grunninn þá held ég að þetta hafi verið blásið upp. Þessi hópur hefur ekki verið neitt nema frábær frá byrjun.“