Dave Kitson sem átti farsælan feril á Englandi sem knattspyrnumaður hefur dvalið á Íslandi síðustu daga. Hann fór á æfingu með HK, hitti Katrínu Jakobsdóttur og var tekinn af lögreglunni. Fótbolti.net sagði fyrst frá.
Kitson lék með Reading og Stoke á ferli sínum auk fleiri liða, hann lék með tveimur Íslendingum. Brynjar Björn Gunnarsson og Ívar Ingimarsson voru liðsfélagar hans, Kitson heimsótti þá.
,,Ég held að Brynjar hafi látið mig fá of litla treyju, ég gæti logið og sagt að þetta hafi verið skemmtilegt,“ skrifar Kitson á Instagram en Brynjar Björn er þjálfari HK.
Kitson kveðst svo hafa verið gripinn af lögreglunni en hann hafi náð að segja þeim sögur af Liverpool. ,,Ég var handtekinn af vingjarnlegustu lögreglumönnum í heimi, ég fékk fullt af dóti í skiptum fyrir sögur af Liverpool, þeirra liði,“ skrifar Kitson.
Hann birtir svo myndir af sér á Austfjörðum þar sem Ívar Ingimarsson gerir það gott í ferðaþjónustu.
