Jose Mourinho, stjóri Tottenham hefur verið að ræða við Troy Parrott framherja félagsins. Þessi 18 ára framherji gæti átt bjarta framtíð.
Parrott hefur fengið tækifæri undir stjórn Mourinho vegna meiðsla lykilmanna en hugarfar Parrott, mætti vera betra.
,,Ég hef rætt við hann um að hugarfar hans verði að vera fyrsta flokks, þegar hann fer og spilar fyrir varaliðið. Hann á að sanna fyrir þeim, af hverju hann er yfirleitt með aðalliðinu,“ sagði Mourinho.
,,Ég hafði ekki áhyggjur af því hvort hann myndi skora eða ekki, heldur hvernig hugarfarið væri. Hann verður að fara með rétta hugarfarið, hann getur ekki farið þangað með hangandi haus.“
Mourinho segist hafa tekið sömu ræðu á Scott McTominay hjá Manchester United. ,,Ég sagði það sama við McTominay, hann var ekki vel liðinn í varaliðinu, vegna þess að hann kom með hangandi haus þangað,“ sagði Mourinho.
,,Um leið og hann breytti því, þá breyttist margt hjá honum. Þegar hann fór aftur í varaliðið, var hann bestur í öllu.“
