Gylfi Þór Sigurðsson truflaði David de Gea á Goodison Park í dag áður en VAR dæmdi mark af Everton.

Þetta segir Ole Gunnar Solskjær, stjóri United, en Everton virtist hafa skorað 2-1 sigurmark í blálokin er boltinn fór í Harry Maguire og í netið.

VAR skoðaði hins vegar atvikið og ákvað að dæma rangstöðu á Gylfa sem lá í grasinu fyrir framan markvörð gestaliðsins.

,,Dominic Calvert-Lewin eltir allt og það var óheppni að þetta varð að marki. Við svöruðum vel og fengum markið sem við áttum skilið,“ sagði Solskjær um fyrsta mark Everton.

,,Lokakaflinn var fjörugur. Við töldum að við gætum og hefðum átt að vinna leikinn en svo var dramatík hinum megin.“

,,David de Gea sagði mér að Gylfi hafi truflað hann. Fyrri markvarslan var frábær, ég var 100 prósent á því að þetta yrði mark.“