Skuldir Manchester United jukust um 73,6 milljónir punda á þremur mánuðum, um er að ræða tímabilið október, nóvember og desember. Félagið skuldar nú 391 milljón punda

Sjónvarpstekjur félagsins fóru niður um 39 milljónir punda miðað við sama tíma í fyrra. Fjarvera liðsins úr Meistaradeildinni telur þar mest.

Tekjur félagsins fóru niður um 19,3 prósent. Sagt er að skuldastaða félagsins hafi aukist vegna breytinga á gengi. United gerir upp í pundum en skuldir félagsins eru í dollurum í Bandaríkjunum.

Ed Woodward kynnti málið i dag og sagði hann að Ole Gunnar Solskjær hefði stuðning félagsins. ,,Við erum að setja allt kapp á góðan endasprett í deildinni, Evrópudeildinni og enska bikarnum. Við höfum haldið áfram að byggja upp hóp okkar, margar breytingar hafa átt sér stað. Markmiðið er að byggja upp til lengri tíma, við höfum sömu skoðun á málinu og Ole,“ sagði Woodward.

United er í fimmta sæti deildarinnar sem gæti gefið Meistaradeildarssæti en liðið er aðeins þremur stigum á eftir Chelsea í fjórða sætinu.