Erling Haaland er ótrúlegur leikmaður en hann gekk í raðir Borussia Dortmund í janúar. Haaland gekk í raðir Dortmund frá RB Salzburg og hefur síðan þá raðað inn mörkunum.
Haaland skoraði tvö mörk gegn Paris Saint-Germain í Meistaradeildinni í 2-1 sigri í gær.
Framherjinn gat valið úr tilboðum í desember og margt benti til þess að hann væri að ganga í raðir Manchester United. The Athetlic segir að Haaland hafi tjáð United að hann vildi koma til félagsins.
Hann fundaði með Ed Woodward, stjórnarformanni félagsins og Ole Gunnar Solskjær stjóra liðsins. Þar kom fram að hann vildi koma til United frá Austurríki.
Það voru hins vegar samskiptin við Mino Raiola sem gerðu útslagið og var ástæða þess að Haaland fór á endanum til Dortmund. Þar var í boði að setja klásúlu sem gefur Haaland færi á að fara sumarið 2021 fyrir rúmar 50 milljónir punda. Slíka klásúlu vildi United ekki setja inn.
United er ekki til í að dansa mikið með Raiola eftir framkomu hans er varðar málefni Paul Pogba.
