Ole Gunnar Solskjær, stjóri Manchester United, viðurkennir að félagið gæti samið endanlega við Odion Ighalo í sumar.

Ighalo er þrítugur framherji en hann kom til United á láni frá Shanghai Shenhua í lok janúargluggans.

,,Þetta er lán en þegar þú ert kominn inn um dyrnar þá gefur það þér tækifæri,“ sagði Solskjær.

,,Það sama má segja um alla leikmenn hvort sem það sé á láni eða endanlega. Ef þú hrífur okkur sem leikmaður, sem manneskja og getur hjálpað hópnum þá er auðvitað séns á að við reyndum að semja til lengri tíma.“

,,Það á ekki bara við um Odion en fyrst þú spurðir þá er auðvitað hans markmið að spila eins vel og hægt er. Það er undir okkur komið að sjá til þess að hann vilji vera hér áfram ef við viljum halda honum.“