Odion Ighalo, nýr leikmaður Manchester United, mun spila með nafn systur sinnar á skónum er hann spilar fyrsta leikinn fyrir félagið.
Ighalo opnaði sig í viðtali um helgina en systir hans Mary Atole lést skyndilega þann 12. desember síðastliðinn.
Hún var mikill stuðningsmaður United og vonaðist alltaf eftir því að bróðirinn myndi spila þar einn daginn sem varð svo að veruleika í janúar.
,,Systir mín var mikill stuðningsmaður Manchester United. Við ólumst öll upp við að horfa á liðið spila,“ sagði Ighalo.
,,Eiginmaður Mary er stuðningsmaður Chelsea og börnin þeirra halda með Liverpool og Manchester City en hún var alltaf trygg United.“
,,Hún vonaðist alltaf eftir því að ég myndi skrifa þar undir. Jafnvel þegar hún sá mig spila með Watford.“
,,Það sorglega er að nú hef ég skrifað undir hjá United en hún er ekki hér til að sjá það. Ég veit að hún fylgist með mér að ofan.“
,,Ég mun spila með nafnið hennar á skónum mínum svo hún sé alltaf með mér á Old Trafford eða í hvaða leik sem er með Manchester United.“
