Thomas Muller hefur engan áhuga á að snúa aftur í þýska landsliðið undir Joachim Low.

Muller hefur spilað 100 landsleiki fyrir Þýskaland en hann fékk þau skilaboð í mars árið 2019 að hann fengi ekki að spila meira undir Low.

Low vildi gefa ungum leikmönnum tækifæri og losaði þá Muller, Mats Hummels og Jerome Boateng.

Muller er aðeins þrítugur og hefur verið í frábæru formi á árinu en hann ætlar ekki að snúa aftur miðað við orð hans í gær.

,,Ég hef engan áhuga á þessu. Ég hugsa um Bayern Munchen og titlana sem við vinnum, að vinna þrjá væri fullkomið,“ sagði Muller.