,,Ég ólst upp sem mikill stuðningsmaður David Beckham,“ sagði Neymar um það þegar hann var spurður um átrúnaðargoð sitt í æsku, hann var ekki lengi að svara.

Neymar er í dag einn þekktasti knattspyrnumaður í heimi en Beckham var stjarnan þegar Neymar var að alast upp í Brasilíu.

,,Ég man þegar ég var ungur, ég var alltaf að fylgjast með knattspyrnumönnum. Ég fylgdist náið með Beckham, hvernig hann sparkaði í boltann vakti athygli mína. Hann skoraði falleg mörk og lagði gríðarlega mikið á sig innan vallar. Ég fylgdist alltaf með honum.“

Beckham var þekktur fyrir að taka sénsa í hárgreiðslum og fatavali. Eitthvað sem Neymar hefur sjálfur gert.

,,Ég hermdi nokkrum sinnum eftir hárgreiðslum hans. Hann fór líka sínar leiðir í fatavali, í dag eru leikmenn gagnrýndir fyrir föt sín. Honum var sama og náði þannig að breyta hugarfari hjá mér og minni kynslóð.“