Gabriel Martinelli fékk tækifæri hjá Barcelona á síðasta ári áður en hann samdi við Arsenal stuttu seinna.
Martinelli greinir sjálfur frá þessu en þessi 18 ára gamli strákur kom frá Ituano í Brasilíu í sumar.
Hann fékk að æfa með akademíu Barcelona en fékk svo engin svör frá félaginu varðandi framtíðina.
,,Áður en ég spilaði á Sao Paulo mótinu þá eyddi ég nokkrum dögum hjá Barcelona. Ég var þar í 15 daga,“ sagði Martinelli.
,,Þeir buðu mér að æfa í akademíunni en eftir það þá vildu þeir ekkert með mig hafa. Þeir sögðu mér ekkert. Ég fór aftur til Ituano, spilaði í Copinha og fór svo til Arsenal.“
,,Þeir sem ég spilaði með voru mjög góðir, ég nýtti mér það og gerði mitt besta.“
,,Það var draumur að sjá hvernig þeir æfa og hvernig félagið virkaði. Ég æfði meira að segja með Ansu Fati og við urðum vinir.„
