Um 20 stuðningsmenn Manchester United mættu á heimili Ed Woodward, stjórnarformanns Manchester United í gær. Gerðu þeir tilraun til að brjótast inn í húsið en komust ekki í gegnum hliðið. Þeir skutu flugeldum að húsinu á meðan þeir sungu lög um Woodward og ósk þeirra að hann láti lífið, sem fyrst. Þá köstuðu þeir nokkrum reyksprengjum inn á lóð hans.
Lögreglan hefur hafið rannsókn á málinu en skemmdarverk voru unnin á eigninni, hlið að húsinu var málað rautt og bjallan að húsinu einnig. Lögreglan vaktar nú heimili Woodward.
Mino Raiola, umboðsmaður Paul Pogba hefur sent frá sér yfirlýsingu og styður hann Woodward. Hann fordæmir þessa menn sem ógnuðu heimili hans.
,,Það sem gerðist í gærkvöldi var ekki eðlilegt, þetta er ofbeldi og ég gagnrýni alltaf ofbeldi. Þetta eru fífl og þetta er hegðun sem á að dæma fyrir. Það á að læsa þetta fólk inni og kenna þeim lífsins reglur. Þetta getur ekki verið hluti af íþróttum, þetta eru íþróttir. Þetta er ekki spurning um líf eða dauða. Fótbolti er skemmtun,“ sagði Raiola.
,,Heldur þú að fólk ráðist á heimili Brad Pitt ef hann gerir lélega bíómynd? Eða heima til Quentin Tarantino? Það er ekki til ástæða eða afsökun fyrir þessu, Ed Woodward hefur fullan stuðning frá mér. Ég hafna svona hegðun, ég er með Ed Woodward, ég er í hans liði.“
,,Svona má ekki gerast, að fara á heimili fólks og ógna honum og fjölskyldu hans. Höfum við misst vitið? Fótbolti er ekki það mikilvægasta í lífinu. Ég er 100 prósent með Ed, allir í fótboltanum styðja hann. Hvort sem þú ert sammála honum eða ekki, þetta er ofbeldi og það eiga allir að styðja hann.“
Raiola hefur verið teiknaður upp sem erkióvinur United enda hefur hann reynt að koma Pogba frá félaginu. Þá hefur hann gagnrýnt störf félagsins og hvernig Woodward stjórnar því.
,,Ef einhver er að reyna að nota mig til að búa til reiði gagnvart Ed, það er rangt. Samband mitt við Ed er gott, það er á fagmannlegum nótum. Við þurfum ekki alltaf að vera sammála.“⠀⠀
