Rúm 85 prósent af leikmönnum Pepsi Max-deildar karla vill að mótið verði lengt. Þetta kemur fram í könnum sem Leikmannasamtök íslands gerðu.

149 leikmenn í deildinni svöruðu og vilja þeir að stærstum hluta lengja mótið, aðeins tæp sex prósent eru á móti því að mótið verði lengt.

Flestir af þeim leikmönnum sem svöruðu vilja að spilað verði með tólf lið eins og er í dag en að spiluð verði þreföld umferð, það yrðu því 33 leikir en ekki 22 leikir.

Nokkur fjöldi vill 14 lið og 2 umferðir en einnig vill nokkur fjöldi fækka liðum í 10 og spila þrefalda umferð.

Ef mótið verður lengt vilja leikmenn fá inn sumarfrí, þannig gætu leikmenn fengið frí á miðju sumri sem ekki hefur verið í gangi.

Þá kemur fram í svörum leikmanna að þeir vilja að samningar sínir verði endurskoðaðir, túlka má það þannig að þeir vilji hærri laun en þeir hafa í dag enda tímabilið lengra ef breytingar verða gerðar.